Учительница все тексты (слова) песен, переводы, видео, клипы

Аудиозапись текста "Учительница" из книги Е.Б. Маркус и Ф.И. Рожанского "Современный водский язык"
Рассказывает Н.А. Ленивенко на кракольском говоре.

Кõнс õли сõта, мэйлэ... мэjе чӱлӓсэ тулти саксõлайзõд. Сиз хӱӱ мэйт мӱӱти соомõлайсийлõ, и мэйт талвõн вээти Соомõсõ. Сииз мэйт, лахсийт, саатõтти шкоўлусõ. Миӓ чӓйн эсимӓйсс воотт, чӓйн õппõмõз. Мэйл õли... õли ӱвӓ учительницц. Тӓмӓ хӓлӱ... пиччи каричнивый платть õли, тӓлл õли пӓӓлл. И сизь jõка оомникоз, кõнс мӱӱ тулимм шкоўлусõ, мӱӱ кõйки иссузимм парта такка, и тӓмӓ мэйлэ нõйси пиллиттэмӓ на органе. А мӱӱ, лахзõд, сииз нõйзимм лаўлома молитвойт. Õппõзин миӓ соомõсси ӱвӓсси, вот.
И сизь ӱхэ кõрра учительницц юттõб: "Ютõлка нӓд мокомайн вэнӓй сõна". И нõйси мэйт, лахсийт, кõйкит нõссõма ӱлэз, ётти jõка лахс соомõлайн юттõйзь бы сэнэ вэнӓлӓйзэ сõна. И кõнс тӓмӓ миннуа нõйси ӱлэлэ, миӓ юттõзин сэнэ вэнӓй сõна ӱвӓсси. И сизь тӓмӓ юттõли лахсийлõ кõйкилõ, што "Нина кайкис парэмп сано".
Вот, а сииз воо ссаа мӱӱ õппõзимм, и сииз ӱли во мэйт тооти таказ Вэнӓймаалõ. Сизь мӱӱ элимм Вэнӓймааз, элимм в Ярославской области. Сизь мӱӱ сэл нӓймм нӓлчӓ я чӱлмӓ, мэйл сэл õли, лиига õли мӓрӓннӱ эло. И сиз васс, нэлльчӱммэткууввõз вооз, мэйт васс тооти коттосõ сихэ, таказ õмасõ чӱлӓсэ, õма родиналõ тооти таказ. Сиз миӓ чӓйн син шкоўлусõ, õппõзин миӓ... мӓрӓннӱсси õппõзин. Ну всё-таки миӓ сэйце клаасса лõпõтин. Сизь миӓ õппõзин на продавца, сизь тэйн тӱӱт лаафкõз. Сиз мэнин мэхэлэ. Котон исун, эн тээ тӱӱт, нӱтт ё õõн на пенсии.